भरतपुर मेडिकल कलेजले एक करोड ५० लाख तिरेन
२०७४, १२ चैत्र सोमबार १३:२१ मा प्रकाशित
कलेज अफ मेडिकल साइन्सेस शिक्षण अस्पताल (पुरानो मेडिकल कलेज) ले जग्गा भाडाबापत भरतपुर अस्पताललालाई रु एक करोड ५० लाख तिर्न बाँकी रहेको छ ।
भरतपुर अस्पतालले आज यहाँ पत्रकार सम्मेलन गरी मेडिकल कलेजले लामो समयदेखि विभिन्न बहाना बनाई अस्पताललाई तिर्नुपर्ने रकम नतिरेको जानकारी दिएको हो ।
अस्पताल विकास समितिका अध्यक्ष राजकुमार राजभण्डारीले मेडिकल कलेजले भरतपुर अस्पताललाई तिर्नुपर्ने बक्यौता रकममध्ये महालेखा परीक्षकको कार्यालयले प्रचलित ऐनबमोजिम औँल्याएको बेरुजु रु ६७ लाख र अस्पताललाई दिनुपर्ने सम्झौताबमोजिमको बक्यौता रकमसमेत गरी करिब रु एक करोड ५० लाख भन्दा बढी बक्यौता देखिएको बताउनुभयो ।
विसं २०५२ सालमा नेपाल सरकारसँग सम्झौता गरी भरतपुर अस्पतालको नौ बिगाहा जग्गा भाडामा लिएर भारतीयले मेडिकल कलेज सञ्चालन गरेका छन् । शुरुवातको समयमा प्रतिबिगाहा प्रतिवर्ष ५० हजार भाडा दिने सम्झौता भएको थियो ।
सम्झौताको समयमा पाँच वर्षपछि प्रत्येक वर्ष १० प्रतिशतका दरले भाडा वृद्धि गर्ने शर्त रहेको अध्यक्ष राजभण्डारीले बताउनुभयो । तर विसं २०६३ सालमा तत्कालीन अस्पताल विकास समितिका अध्यक्ष बद्री तिमिल्सिना १० प्रतिशत वृद्धि हुने प्रावधान खारेज गर्नुभएको उहाँले बताउनुभयो ।
यसबाट अस्पताललाई ठूलो आर्थिक क्षति भएको छ, अध्यक्ष राजभण्डारीले भन्नुभयो – ‘यो निर्णय अस्पतालकै इतिहासमा घातक र हानिकारक भएको छ ।’
पुरानो सम्झौतालाई पुनरावलोकन गर्न अस्पतालले पटकपटक आग्रह गरे पनि मेडिकल कलेजले अटेर गर्दै आएको अस्पतालका मेडिकल सुपरिटेण्डेण्ट डा रुद्रप्रसाद मरासिनीले बताउनुभयो । उहाँले सम्झौता पुनरावलोकन नभएसम्म मेडिकल कलेजलाई अस्पतालमा प्रयोगात्मक कक्षा पनि नदिइएको बताउनुभयो ।
अस्पताल विकास समितिका निवर्तमान अध्यक्ष विजय सुवेदीले २०६३ मा सम्झौता संशोधन नभएको भए अहिले अस्पतालले प्रतिबिगाहा वार्षिक रु दुई लाख २५ हजार पाउन सक्ने बताउनुभयो । अस्पतालले पाउनु पर्ने रकम मेडिकल कलेजले नियमित रुपमा तिर्नुपर्ने आफ्नो त्यतिबेलाको अडान कायमै रहेको उहाँले बताउनुभयो ।