भारतमा उपचाररत कांग्रेस नेता चन्द्र भण्डारीको आज दुई शल्यक्रिया गरिंदै
सबै पारामिटर नर्मल भए पनि अझै ४८ घण्टा भेन्टिलेटरमै राखेर उपचार गरिने
२०७९, ५ फाल्गुन शुक्रबार ११:३१ मा प्रकाशित
जनस्वास्थ्य सरोकार, काठमाडौं । ग्यास सिलिन्डर विस्फोटमा घाइते हुनुभएका नेपाली कांग्रेसका केन्द्रीय सदस्य तथा सांसद चन्द्र भण्डारीको आज शुक्रबार भारतमा शल्यक्रिया गरिने भएको छ । थप उपचारका लागि बिहीबार मुम्बईको नेशनल बर्न सेन्टर पु¥याईएका भण्डारीको शुक्रबार बिहान १०ः३० बजे र दिउँसो १ः३० बजे दुईवटा शल्यक्रिया गरिने कांग्रेस नेता योगराज कँडेलले जानकारी दिनुभयो ।
सांसद भण्डारीको उपचारमा संलग्न डा. सुनिल केस्वानीले राति १०ः३० बजे परीक्षण गरेपश्चात शरीरमा फ्लुईडको मात्रा डबल गरिनुकासाथै शुक्रबार बिहान १०ः३० मा पहिलो र १ः३० मा दोस्रो सर्जरी गरिने जानकारी दिनुभयो । उहाँका अनुसार हात र खुट्टा जलन बढी भएकाले प्लाष्टिक सर्जरी पश्चात रोग प्रतिरक्षा प्रणाली बढ्ने हुँदा सर्जरीलाई प्राथमिकतामा राखिएको छ । तर, अनुहार सुन्निएकाले तत्काल अनुहारको प्लाष्टिक सर्जरी गर्न नमिल्ने उहाँको भनाई छ । शरीरको भित्री भागको जलनका लागि भने औषधि चलाइएको छ ।
त्यस्तै, डा. सन्दिप मिस्त्रीले राती ११ः३० बजे परीक्षण गरेपश्चात सांसद भण्डारीका सबै पारामिटरहरू नर्मल भएपनि अझै ४८ घण्टा भेन्टिलेटरमै राखेर उपचार गर्नुपर्ने जानकारी दिनुभयो । त्यसैगरी डा. अमुलले राती १२ः३० बजे परीक्षण गरेपश्चात हृदयको चाल नर्मल रहेको र एन्टिबायोटिक्सलाई निरन्तरता दिइएको जानकारी दिनुभयो । साथै आत्तिनुपर्ने अवस्था नरहेको उहाँले उल्लेख गर्नुभयो ।
कीर्तिपुर अस्पतालले भण्डारीलाई सुविधा सम्पन्न अस्पतालमा उपचार गर्न सुझाव दिएपछि बिहीबार श्री एयरलाइन्सको विमानमार्फत थप उपचारका लागि चिकित्सकको टोलीसहित मुम्बई लगिएको थियो ।
संसद भण्डारीको शरीर ३० प्रतिशत जलेको कीर्तिपुर अस्पतालले जनाएको छ । अस्पतालका अनुसार भण्डारीको दुवै हात खुट्टा र अनुहारमा जलन भएको छ । तातो धुवाँका कारणले श्वास नलीमा पनि जलन भएको हुनसक्ने अस्पतालका डा. किरण नकर्मी र डा. निजिना ताम्राकारद्धारा जारी विज्ञप्तिमा उल्लेख छ ।
यस्तो अवस्थामा सुविधासम्पन्न अस्पतालमा उपचार गर्नु राम्रो हुने सुझाव चिकित्सकले दिएका थिए । उपचारका क्रममा भण्डारीकी आमा हरिकला भण्डारीको भने बिहीबार नै निधन भएको छ । बुद्धनगरस्थित निवासमा बुधबार राति ग्यास सिलिन्डर विस्फोट हुँदा भण्डारी र आमा हरिकला घाइते हुनुभएको थियो ।
