भरतपुर अस्पतालः किन भुइँमा उपचार ?

‘अकस्मात सुत्केरी गराउन आउँछन्, बच्चा जन्मिएपछि शैय्या अभावमा भूइमै उपचार गराउन बाध्य भएका छौं, भरतपुर अस्पतालका मेडिकल सुपरिटेण्डेण्ट डा. रुद्र मरासिनीले भने,‘शैय्या थोरै छ, सुत्केरी सेवा लिन आउने धेरै छन् ।’ दैनिक ६० जना र चितवनमा ९० प्रतिशत सुत्केरी गराउने भरतपुर अस्पताल रहेको भन्दै मेसु डा. मरासिनीले हाल देखिएको समस्या समाधानका लागि अस्थायी भवनको बारेमा पनि सोच बनाइएको जानकारी गराए । उत्कृष्ट सेवा दिएको भन्दै गत हप्ता मात्रै यस अस्पतालले राजधानीमा स्वास्थ्य खवर पत्रिकाबाट उत्कृष्ट अस्पतालको अवार्ड पाएको थियो ।

अस्पतालमा रहेको ५० शैय्या अपुग भएपछि सुत्केरी र नवजात शिशुको भुइमै उपचार हुने गरेको अस्पतालका सूचना अधिकारी गोपाल पौडेलले जनाए । अस्पतालको भौतिक पूर्वाधारको विकासमा ध्यान नदिँदा चिकित्सक र उपचार उपकरण उत्कृष्ट भए पनि सेवाग्राही सन्तुष्ट हुन सकेका छैनन् ।

सुत्केरीहरु गर्मीको समयमा नवजात शिशु लिएर अस्पताल भवन बाहिर रात विताइरहेका छन् । भुइमा पनि खचाखच सुतिरहेका देखिन्छन् । अवोध नवजात शिशुहरु जन्मने वित्तिकै भुइमा सुत्न बाध्य छन् । सुगम र प¥याप्त उपचार सेवा भनिएको जिल्लामै यस्तो उपचार सेवाले भने सुत्केरी हरु नै अचम्ममा परेका छन् ।

‘यहाँको उपचार गराउने तरिका ठीक छ, तर भुइमा वसेर उपचार सेवा लिनुपर्दा निकै गाहंो भएको छ, शुक्रनगरकी नम्रता महतोले भनिन् । चिसो भुइमा राखेर गरिने उपचारले कतै बच्चा र आमालाई नै भविष्यमा जोखिमको खतरा रहने चिकित्सकहरु बताउँछन् । स्त्री तथा प्रसुति रोग विशेषज्ञ डा. सुनिलमणी पोखरेलले भुइमा राखेर उपचार गराउँदा विभिन्न रोगहरुको संक्रमण हुन सक्ने बताए ।

सुत्केरी र नवजात शिशुले पाएको पीडा

१) भवन बाहिर सुतेर रात काट्न बाध्य
२) भुइमै सुत्दा पनि खचाखच
३) नर्सबाट हुने नियमित हेरचाह छैन
४) अचाक्ली गर्मीको पीडा
५) विभिन्न रोग सर्ने डर

-नयाँ पत्रिका दैनिकबाट