हेलिकप्टरबाट सुत्केरीको उद्धार
२०७६, २४ बैशाख मंगलवार ०५:१९ मा प्रकाशित
समस्यामा परेकी एक सुत्केरीको हेलिकप्टरबाट उद्धार गरिएको छ । डेरामा सुत्केरी भएर रक्तस्राव अत्याधिकपछि गम्भीर अवस्था भएकाले जिल्ला अस्पताल भोजपुरको सिफारिसमा कमला राईको हेलिकप्टरबाट उद्धार गरिएको हो ।
सेनाको हेलिकप्टरमार्फत सुत्केरीको उद्धार गरिएको सहायक प्रमुख जिल्ला अधिकारी प्रयास भट्टराईले बताए । रामप्रसाद राई गाउँपालिका वडा ३ घर भई भोजपुर नगरपालिका वडा ९ भोटेपसलमा बस्दै आएकी राईले डेरामै बच्चा जन्माएकी थिइन् ।
बच्चा जन्माएपछि अत्याधिक रक्तश्राव हुँदा उनको स्वास्थ्य अवस्था गम्भिर बनेको थियो । घरैमा छोरा जन्माएकी कमलालाई जिल्ला अस्पताल भर्ना गरिएको थियो । हेलिकप्टरमार्फत उपचारका लागि विराटनगरस्थित कोशी अंञ्चल अस्पताल पठाइएको जिल्ला अस्पताल प्रमुख डा. पवित्रा श्रेष्ठले बताइन ।
राष्ट्रपति महिला उत्थान कार्यक्रमअन्तर्गत ‘दुर्गम क्षेत्रका ज्यान जोखिममा परेका गर्भवती तथा सुत्केरी महिलाका लागि हवाई उद्धारसम्बन्धी कार्यविधिअनुसार कमलाको उद्धार गरिएको हो । यसअघि चारजना सन्तानलाई जन्म दिएकी कमलाको पाठेघरमा समस्या भएका कारण अत्यधिक रक्तश्राव भएको र नरोकिएपछि विराटनगर पठाइएको चिकित्सकले बताए ।
ग्रामीण क्षेत्रका ज्यान जोखिममा परेका गर्भवती तथा सुत्केरी महिलाको उद्धार गर्ने कार्य सरकारले पुसबाट थालेको हो । दुर्गम हिमाली तथा पहाडी क्षेत्रमा गर्भवती तथा सुत्केरी अवस्थामा स्वास्थ्य समस्याका कारण ज्यान जोखिममा रहेकालाई तत्काल उद्धार गरी स्वास्थ्य सेवा प्रदान गर्ने उदेश्यले कार्यक्रम सञ्चालन गरिएको हो ।