नियमित हुँदैनन् चिकित्सक
२०७६, २३ जेष्ठ बिहीबार ०८:०९ मा प्रकाशित
मलङ्गवास्थित जिल्ला अस्पतालमा चिकित्सक नियमित आउँदैनन्, आए पनि बस्दैनन् । अस्पताल परिसर फोहरले दुर्गन्धित छ । सरकारले तोकेबमोजिम निःशुल्क औषधिको समेत अभाव छ ।
जिल्ला अस्पतालमा गुणस्तरीय स्वास्थ्य सेवा पाउन नसकेपछि बिरामीहरू निजी अस्पताललगायत अन्यत्र जान बाध्य छन् । बिरामीहरू उपचारका लागि जनकपुर, वीरगञ्ज र छिमेकी मुलुक भारतको सीतामढीस्थित विभिन्न अस्पताल पुग्ने गरेका छन् ।
स्थानीयबासीका अनुसार अस्पतालमा चिकित्सक मात्रै होइन, अन्य स्वास्थ्यकर्मी पनि प्रायः बस्दैनन् । अस्पताल प्रशासन स्रोतका अनुसार चिकित्सकहरूबीच आन्तरिक द्वन्द्वका कारण यो समस्या आएको हो । आन्तरिक द्वन्द्वका कारण अस्पताल नआएकाले सेवाग्रही मर्कामा परेका छन् ।
जिल्ला अस्पतालमा उपचारका लागि आउने बिरामीलाई अन्यत्र लैजान सिफारिस गरी पठाउने गरिएको छ । अस्पताल परिसर, शौचालयलगायत वरिपरिको वातावरण प्रदूषित रहेको स्थानीय कौशल सिंहले बताए । ‘अस्पताल प्रशासनको भूमिका नै कमजोर छ, कमजोर व्यवस्थापनका कारण सरसफाई अभाव भएको हो,’ उनले भने, ‘चिकित्सक नियमित बस्दैनन् ।’
कमजोर व्यवस्थापन र कुशल नेतृत्व अभावका कारण लामो समयदेखि चिकित्सक अभाव रहेको जिल्ला अस्पताल सुधार गरी गुणस्तरीय सेवा प्रवाह गर्न स्थानीय तहका जनप्रतिनिधिले चासो लिएका छैनन । तर, जनप्रतिनिधिहरू यो कुरा मान्न तयार छैनन् । अस्पतालका चिकित्सकलगायत कर्मचारी जनप्रतिनिधिलाई टेर्दैनन् ।
अस्पतालको सेवा गुणस्तरीय बनाउन जनप्रतिनिधिले पटकपटक चासो राखे पनि कर्मचारीले बेवास्ता गरेकाले समस्या भएको मलंगवा नगरपालिका–८ का वडाध्यक्ष ईश्वरी श्रेष्ठले बताए । उनले अस्पतालका मेडिकल सुपरिडेन्ट लोभलालच छोडेर अपनत्व महसुस गर्दै सक्रिय भएमा गुणस्तरीय सेवा प्रवाह गर्न सकिने बताए ।
चिकित्सक नियमित नआउने, अस्पताल परिसरमा फोहर, मैला दुर्गन्ध र निःशुल्क औषधि अभावको कारण सेवाग्रही हैरान भएको वडाअध्यक्ष श्रेष्ठले बताए । उनले अस्पतालमा प्रसूति गराउन आउने सुत्केरी महिलालाई सरकारले तोकेको यातायात खर्च पनि पाउनबाट वञ्चित रहेको बताए ।