‘रेमडिसिभर’ औषधि ल्याउन औषधि व्यवस्था विभागले दियो स्वीकृति
२०७७, ३२ श्रावण आईतवार १४:५७ मा प्रकाशित
जनस्वास्थ्य सरोकार, काठमाडौं। औषधी व्यवस्था विभागले अन्तर्राष्ट्रिय स्तरमा कोरोना भाइरसको उपचारमा प्रयोग गर्न थालिएको रेमडिसिभर नामक औषधी नेपालमा पनि आयात गर्न स्वीकृत दिएको छ । शरिरमा अक्सिजनको मात्रा कम भई आइसियु कक्षमा रहेका विरामीको स्वास्थ्य अवस्था सुधार गर्न प्रयोग गरिने औषधी आयात गर्न विभागले औषधी व्यवसायीहरुलाई स्वीकृत दिएको हो ।
विभागका महानिर्देशक नारायण ढकालले नेपाल स्वास्थ्य अनुसार परिषद्को प्रोटोकल अनुसार क्लिनिक ट्रायलका लागि अनुमति दिएको जानकारी दिनुभयो । औषधी दर्ता गर्ने नभइ आकस्मिक रुपमा चाहिने समयमा परिषद्को प्रोटोलकमा टेकेर मात्र प्रयोग गर्न सकिने गरी निर्णय भएको उहाँले जानकारी दिनुभयो ।
हाल विभागले सिप्ला, माइलन र हिटेरो कम्पनीबाट मात्र औषधी खरिद गर्न भनेको छ । जसमा ६ हजारदेखि ८ हजार मूल्य सम्मका औषधी रहेको महानिर्देशक ढकालले जानकारी दिनुभयो । औषधी व्यवसायीहरुले भदौ ४ गतेसम्म औषधी ल्याउने जनाएका छन् ।
औषधीलाई विभागले स्वीकृत नदिँदा औषधी व्यवसायीहरुले अवैधानिक रुपमा ४० देखि ५० हजार रकम असुल गरी बिक्री वितरण गर्दै आएको गुनासो बढेको थियो ।
